Ermal Dredha ka bërë një reagim një ditë pasi dha dorëheqjen nga detyra si kryebashkiaku i Vlorës. Në një postim të gjatë në rrjetet sociale, Dredha shpjegon se arsyet që e kanë çuar drejt këtij vendimi.
“Dorëheqja ime vjen si një akt reflektimi dhe përgjegjësie. Rrethanat aktuale, familjare dhe personale, apo dhe ato politike e administrative, më shtyjnë të besoj se dorëheqja ime është veprimi më i drejtë në këtë moment. Ky vendim nuk nënkupton largim nga përgjegjësia publike, por është një akt i vetëdijshëm për të krijuar hapësirë për ide dhe ritme të reja zhvillimi për bashkinë tonë.”, shkruan ai në letrën e dorëheqjes drejtuar kryeministrit Edi Rama.
Në një mesazh drejtuar qytetarëve të Vlorës dhe Kryeministrit, Dredha shpreh mirënjohjen dhe falenderimet për mbështetjen e marrë gjatë kohës që ka shërbyer në krye të bashkisë, duke theksuar lidhjen e fortë emocionale me qytetin që e ka rritur dhe për të cilin ka punuar me përkushtim.
“Të nderuar qytetarë të Vlorës, Me mirënjohje dhe përulësi, për gjithçka ndamë bashkë përgjatë këtij rrugëtimi, bashkë me falenderimet e pafundme për çdo mbështetje, po ndaj me ju letrën time të dorëheqjes! Shpresoj në mirëkuptimin tuaj, me bindjen që Vlora ka plotë mundësi për kontribute të vyera! Si djalë i këtij qyteti kaq të dashur, do të shërbej në çdo formë, njësoj siç kam bërë çdo ditë të karrierës sime diplomatike sepse e vetmja gjë që mbetet e pandryshuar është që Vlora do të jetë gjithnjë e para në zemrën time!”, shkruan Dredha. Krahas mesazhit drejtuar qytetarëve, Dredha ka ndarë dhe letrën drejtuar kryeministrit ku sqaron pse mori vendimin për t’a lënë mandatin si kryebashkiak në mes. Ai e falënderon kryeministrin për çdo mbështetje që i ka dhënë dhe zotohet të shërbejë në forma të tjera në komunitet.
LETRA PËR RAMËN
I nderuar z. Kryeministër,
Sot, me përgjegjësinë më të lartë morale dhe institucionale, kam vendosur të paraqes dorëheqjen time nga detyra si Kryetar i Bashkisë së Vlorës.
Ky është një nga ato momente ku fjala nuk del lehtë, jo sepse mungon bindja, por sepse pesha e asaj që dua të them është e madhe dhe shumë e ndjeshme për mua si njeri, si shërbyes publik dhe si bir i këtij komuniteti që e dua me gjithë zemër.
Pavarësisht sfidave dhe vështirësive që janë shfaqur gjatë rrugës, kam besuar gjithmonë se transparenca dhe puna e ndershme janë baza mbi të cilat ndërtohet një shërbim i mirëfilltë ndaj komunitetit.
Kam jetuar çdo ditë të këtij detyrimi me përkushtim të plotë dhe zell. Kam bërë më të mirën që kam ditur e mundur, ndoshta jo gjithmonë mjaftueshëm, por gjithmonë me ndershmëri. Kam qenë pranë njerëzve në ditë të mira dhe në ditë të vështira, dhe i kam ndjerë hallet dhe shpresat e tyre si të ishin familja ime.
Megjithatë, besoj se në një moment të caktuar është e rëndësishme të dish të largohesh me dinjitet, për t’i hapur rrugë energjive dhe ideve të reja.
Dorëheqja ime vjen si një akt reflektimi dhe përgjegjësie. Rrethanat aktuale, familjare dhe personale, apo dhe ato politike e administrative, më shtyjnë të besoj se dorëheqja ime është veprimi më i drejtë në këtë moment. Ky vendim nuk nënkupton largim nga përgjegjësia publike, por është një akt i vetëdijshëm për të krijuar hapësirë për ide dhe ritme të reja zhvillimi për bashkinë tonë.
Z. Kryeministër,
Ju falënderoj për bashkëpunimin institucional! Ky vendim nuk ndryshon as respektin dhe as përgjegjësinë që ndjej ndaj vendit tim dhe ndaj qytetarëve tanë.
Ju falënderoj për çdo mbështetje që më keni dhënë dhe për çdo shpresë që kemi ndarë së bashku. Unë mbetem i përkushtuar ndaj komunitetit tim dhe do të vazhdoj të kontribuoj në forma të tjera për të mirën e përbashkët.
Me respekt të thellë,
Ermal Dredha
Kryebashkiaku Dredha ka dhënë dorëheqjen gjatë paradites së djeshme, 10 shtator. Arsyet e dorëheqjes së Ermal Dredhës nuk dihen ende, por mësohet se në vend të tij është emëruar Erlis Halili.
Dredha e mori këtë detyrë më 3 korrik të vitit 2023. Muajt e fundit, ai u gjend përballë një sërë kritikash sa i takon zjarrit te landfilli i mbetjeve në Vlorë dhe problemet me furnizimin me ujë të pijshëm në qytetin bregdetar.
Kujtojmë se më herët, Dredha ka mbajtur postin e ambasadorit të Shqipërisë në Emiratet e Bashkuara Arabe, ndërsa ka shërbyer edhe si Konsull i Përgjithshëm i Shqipërisë në Bari, Itali.
