Partia Demokratike kërkon anulimin e rritjes së çmimeve të referencës për pasuritë e paluajtshme në të gjithë vendin.
Në një deklaratë për mediat, nënkryetari i grupit të këshilltarëve bashkiakë në bashkinë e Tiranës, Dorian Teliti, tha se vendimi është marrë pa asnjë konsultim publik me qytetarët dhe grupet e interesit
“Çmimet e referencës rriten ndjeshëm, madje në disa zona, si psh Durrësi, këto çmime reference janë trefishuar, duke arritur deri në 2 mijë euro për m2. Me këtë vendim qeveria godet drejtpërdrejt qytetarët. Rritet menjëherë taksa e pronës së banesave.
Bëhet më e kushtueshme blerja e një apartamenti si pasojë e rritjes së taksës së ndikimit në infrastrukturë, duke ndikuar drejtpërsëdrejti edhe në rritjen e kostove të jetesës”, tha Teliti.
PD kërkon anulimin e menjëhershëm të kësaj iniciative, duke mos ndryshuar çmimet e referencës së banesave.
“Realizimin e një reforme të thellë dhe të ndershme fiskale, me anë të një procesi konsultimi publik transparent me qytetarët, grupet e interesit dhe profesionistët e fushës, me qëllim uljen e barrës fiskale për familjet dhe sipërmarrjet shqiptare”, tha Teliti.
