Ka shkuar në tre numri i personave të arrestuar në lidhje me vrasjen e Anesti Ramës, ngjarje që ndodhi më 23 korrik në fshatin Frashër.
Policia e Fierit ka arritur në përfundimin se vajza viktimës, 26-vjeçarja Emanilda Rama ka patur një bashkëpunëtor. Bëhet fjalë për Çlirim Doganin, një 55-vjeçar nga fshati Arapaj i Roskovecit, i cili është vënë në pranga nga policia.
“Nga kryerja e hetimeve dyshohet se ky shtetas ka bashkëpunuar me shtetasen E. R., në vrasjen e babait të saj nëpërmjet strangulimit (mbytje me tel), si edhe duke përdorur sende të forta dhe mjete prerëse”, njoftoi policia.
Kujtojmë se për këtë ngjarje fillimisht u vu në pranga Emanilda Rama. Më pas u arrestua edhe nëna e saj, 53-vjeçarja Valbona Rama, e cila ka kryer veprime për fshehjen e vrasjes së kryer nga vrasja e saj. Të dyja e denoncuan në polici ngjarjen si aksidentale.
Ato pretendonin se Anesti ishte rrëzuar në tualet aksidentalisht dhe, si pasojë e dëmtimeve të marra, kishte humbur jetën.
Por ekspertiza mjeko-ligjore në trupin e viktimës provoi të kundërtën dhe u zbulua se 56-vjeçari ishte mbytur me tel.
Krahas këtyre të dhënave, e bija e Anesti Ramës, Emanilda, pranoi para hetuesve autorësinë në ngjarje, teksa tregoi se akti i rëndë ishte ndërmarrë prej saj pasi i ati ishte fanatik dhe i ushtronte shumë presion.
Kjo marrëdhënie mësohet se mbizotëronte prej vitesh në familjen Rama, fakt ky që është pohuar edhe nga fqinjë e të afërm të viktimës, aq sa viktima jetonte në një ambient të veçuar të shtëpisë.
