Presidenti amerikan, Donald Trump, vizitoi të premten zonat e goditura nga përmbytjet katastrofike në Teksas. Ai vlerësoi reagimin e autoriteteve federale dhe shtetërore, duke e quajtur situatën si diçka që nuk e kishte parë kurrë më parë. Deri më tani, përmbytjet kanë shkaktuar të paktën 120 viktima dhe mbi 170 persona rezultojnë ende të zhdukur.
Nga Kerrville, ku mori pjesë në një tryezë të rrumbullakët me autoritetet lokale, Trump tha se agjencia federale e emergjencave (FEMA) kishte vepruar “shpejt dhe në mënyrë efektive” dhe se “çdo amerikan duhet të frymëzohet nga ajo që është bërë”.
Megjithatë, gjatë vizitës, Trump shmangu komentet për zotimet e mëparshme të administratës së tij për të shfuqizuar ose reformuar thellësisht FEMA-n. The Washington Post raportoi se, ndonëse planet për mbylljen e agjencisë janë zbehur, zyrtarët e administratës nuk japin ende një përgjigje të qartë për të ardhmen e saj.
I pyetur nga gazetarët për mungesën e paralajmërimeve për përmbytjet, Trump u përgjigj duke lavdëruar reagimin e ekipeve të emergjencës dhe duke e quajtur një reporter “person të keq” për pyetjen.
Në një deklaratë për NBC, Trump tha se ngjarja ishte “një fatkeqësi që ndodh një herë në 200 vjet” dhe se ai nuk kishte shkuar më herët në Teksas për të mos penguar punën e ekipeve të kërkimit.
Gjatë udhëtimit, Trump ishte i shoqëruar nga Zonja e Parë Melania Trump, guvernatori i Teksasit Greg Abbott, si dhe zyrtarë të tjerë të lartë, përfshirë senatorët John Cornyn dhe Ted Cruz. Ai ndaloi pranë lumit Guadalupe për të parë nga afër dëmet dhe më pas mbajti një fjalim në Kerrville.
Sekretarja e Sigurisë Kombëtare, Kristi Noem, e cila mbikëqyr FEMA-n, përshkroi skena rrëqethëse nga kampi i vajzave “Camp Mystic”, ku u konfirmua vdekja e të paktën 27 personave. Ajo tha se kjo është një kohë ku “amerikanët duhet të kujtojnë se janë krijuar për t’i shërbyer njëri-tjetrit”.
Noem drejton gjithashtu një këshill që po shqyrton mundësinë e reformimit të agjencisë.
“Qeveria federale nuk i menaxhon këto katastrofa, i menaxhojnë shtetet,” u shpreh ajo përpara Trumpit, duke theksuar se reforma synon të “shkurtojë burokracinë e FEMA-s së vjetër”.
Ndërkohë, Shtëpia e Bardhë nuk dha një përgjigje të qartë nëse do të vijojë përpjekjet për të mbyllur ose reduktuar ndjeshëm agjencinë. Zëdhënësja Karoline Leavitt tha se “kjo është një çështje që do të vazhdojë të diskutohet”.
Trump ka përdorur shpesh situata të fatkeqësive natyrore për qëllime politike. Ai ka akuzuar më parë administratën Biden për shpërndarje selektive të ndihmave dhe ka kritikuar ashpër guvernatorët demokratë për menaxhimin e krizave.
Për momentin, zyrtarët thanë se FEMA ka miliarda dollarë në dispozicion për të mbuluar nevojat emergjente dhe Trump ka premtuar se “çfarëdo që i duhet Teksasit, do ta marrë”. Megjithatë, mbetet e paqartë se çfarë e pret agjencinë në muajt në vijim.
