Rreth 14 mijë njerëz, më 29 qershor, bllokuan rrugët në Serbi, të zemëruar pas arrestimit të protestuesve antiqeveritarë që u përplasën me policinë në një tubim masiv ku kërkonin zgjedhje të parakohshme.
Protestuesit vendosën barriera metalike dhe kosha mbeturinash në pika të ndryshme të kryeqytetit Beograd, duke bllokuar edhe një urë kyçe mbi lumin Sava. Në qytetin verior, Novi Sad, ata hodhën vezë ndaj zyrave të Partisë Progresiste Serbe në pushtet.
Mediat serbe raportuan se bllokada të ngjashme janë organizuar edhe në qytete më të vogla në të gjithë vendin.
Protestuesit kërkuan lirimin e dhjetëra studentëve dhe të tjerëve që u arrestuan gjatë sulmeve ndaj policisë ose për akuzat se po planifikonin rrëzimin e qeverisë në tubimin e së shtunës, 28 qershor, në Beograd.
Në tubimin që mblodhi dhjetëra mijëra vetë, pas afro tetë muajsh protestash të vazhdueshme që tronditën presidentin populist Aleksandar Vuçiç, protestuesit shpallën qeverinë aktuale si “jolegjitime” dhe i vunë asaj përgjegjësinë për çdo rast dhune.
