Britania e Madhe pritet të shpallë sanksione të reja kundër Rusisë për të “kufizuar makinerinë e luftës së Putinit”, në bashkëpunim me aleatët e tjerë të Ukrainës, të martën.
Kryeministri britanik Sir Keir Starmer tha se masat e reja do të rrisin presionin ekonomik ndaj Kremlinit për t’i treguar Vladimir Putinit “se është në interesin e tij dhe të Rusisë që të tregojë se është serioz për paqen”.
Megjithatë, duket e pamundur që SHBA të bashkohet me këtë nismë, pasi Donald Trump sinjalizoi kundërshtimin e tij ndaj masave të mëtejshme gjatë samitit të G7-ës në Kanada, duke deklaruar se sanksionet “kushtojnë shumë para për SHBA-në”.
Ndërkohë, zyrtarët ukrainas thanë se 14 persona humbën jetën pas një vale të re sulmesh me dronë dhe raketa që goditën Kievin gjatë natës. Zyrtarë nga Downing Street thanë se paketa e re e sanksioneve do të synojë të vazhdojë “presionin mbi kompleksin ushtarak-industrial rus”, por nuk dhanë detaje të mëtejshme.
Në një deklaratë, Sir Keir tha se ai dhe partnerët e tjerë të G7-ës po finalizojnë masat e reja në samitin e Albertës, dhe se ato do të “godasin të ardhurat nga energjia e Rusisë dhe do të ulin fondet që ajo mund të derdhë në këtë luftë të paligjshme”.
“E vërteta është se Rusia nuk i ka të gjitha kartat në dorë,” tha ai.
I pyetur pse nuk është dhënë më shumë informacion mbi përmbajtjen e paketës së sanksioneve, një zëdhënës i Zyrës së Kryeministrit britanik tha: “Është thjesht fakt që samiti i G7-ës sapo ka filluar… do të ishte e nxituar të dalim para asaj që do të prodhojnë këto takime.”
Më herët të hënën, Trump, i cili njoftoi se do të largohej më herët nga samiti për shkak të përshkallëzimit të konfliktit në Lindjen e Mesme dha sinjale se nuk e mbështet planin për sanksione të reja.
Ai tha: “Po flisni për miliarda e miliarda dollarë. Sanksionet nuk janë aq të lehta. Nuk është rrugë njëkahëshe.”
Trump shtoi se ishte “duke pritur për të parë nëse mund të arrihet ndonjë marrëveshje” mes Rusisë dhe Ukrainës për t’i dhënë fund luftës, përpara se të mbështeste një paketë të re sanksionesh.
Gjatë një konference për shtyp me Kryeministrin kanadez Mark Carney, Trump gjithashtu e quajti largimin e Rusisë nga grupi G7 “një gabim” dhe tha se kjo “e komplikon jetën më shumë”.
Në vitin 2014, ish-presidenti amerikan Barack Obama dhe liderët e tjerë botërorë vendosën të përjashtojnë Rusinë nga grupi i ekonomive kryesore pas aneksimit të Krimesë nga ana e saj.
