Presidenti i SHBA-së, Donald Trump, ka urdhëruar vendosjen e Gardës Kombëtare dhe forcave elitare të ushtrisë në Los Angeles, duke shpërfillur autoritetin e shtetit të Kalifornisë dhe urdhrat e gjykatave federale. Veprimi po konsiderohet një tronditje serioze ndaj themeleve demokratike të vendit.
Situata në Kaliforni ka hyrë në një fazë të re tensioni, pasi Presidenti amerikan Donald Trump ka përdorur ushtrinë për të shtypur protestat që po zhvillohen prej ditësh në rrugët e Los Angeles. Vendimi i kreut të shtetit ka shpërfillur autoritetin e guvernatorit demokrat Gavin Newsom dhe ka sfiduar urdhrat e gjykatave që ndalojnë ndërhyrjen ushtarake pa miratim shtetëror.
Mijëra protestues kanë dalë në rrugë duke kundërshtuar veprimet e autoriteteve të imigracionit, ndërkohë që ndalim-qarkullimi gjatë natës, i vendosur nga kryetarja e bashkisë, ka sjellë vetëm qetësi të përkohshme.
Garda Kombëtare, e vendosur fillimisht nga Presidenti Trump të shtunën, tashmë mbështetet nga 700 marinsa, pjesë e forcave elitare të reagimit të shpejtë. Sipas ushtrisë amerikane, trupat janë të vendosura për të mbrojtur ndërtesat federale dhe punonjësit e Imigracionit dhe Doganave (ICE).
Megjithatë, ndërhyrja federale pa miratim të shtetit përbën një precedent të rrezikshëm. Guvernatori i Kalifornisë ka refuzuar zyrtarisht urdhrin e Trump dhe ka ngritur padi ndaj administratës federale.
Sipas ligjit amerikan, një president nuk mund të vendosë forca ushtarake në një shtet pa kërkesën e atij shteti, përveçse në raste të jashtëzakonshme, kur ka një rebelim të armatosur kundër autoritetit federal. Por në këtë rast, ekspertët ligjorë argumentojnë se nuk ka kushtet që të justifikojnë një ndërhyrje të tillë, dhe veprimi i Trump shihet si një shkelje e rëndë e autonomisë së shtetit.
Kritikët paralajmërojnë se ky veprim i Presidentit po cenon themelet demokratike të Shteteve të Bashkuara, që ndërtohen mbi parimin e ndarjes së pushteteve dhe të drejtës së shteteve për vetëqeverisje – një parim që është mishëruar edhe në vetë emrin e vendit: “Shtetet e Bashkuara të Amerikës”. Tensionet mbeten të larta në Los Angeles, ndërsa komuniteti vendas vazhdon protestat dhe thirrjet për tërheqjen e trupave ushtarake nga rrugët e qytetit.
