Kryeministri Edi Rama iu është përgjigjur pyetjeve të komentuesve në profilin e tij “Facebook” në rubrikën “Sy më sy”. Rama është pyetur nëse do të ketë lehtësira për qytetarët që individualisht do të vendosin panele diellore mbi çatitë e tyre.
Për këtë Rama tha se së shpejti do të bëhet shpallja e paketës së dytë mbështetëse për panelet diellore për familjarët dhe bizneset në vend. Ai shtoi se sot jemi të parët në rajon për vetë prodhimin e energjisë diellore nga familjarët dhe nga bizneset.
“Jemi sot të parët në rajon për vetë prodhimin e energjisë diellore nga familjarët dhe nga bizneset, prodhojmë 196 Megawat, katërfishin e Serbisë dhe më shumë se dhjetëfishin e Kosovës, Malit të Zi dhe RMV. Së shpejti do të behët shpallja e paketës së dytë mbështetëse për panelet diellore, për familjarët në banesë dhe do jetë një sukses, sepse siç ndodhi me paketën arë, interesi është i madh dhe faktikisht u shterua i gjithë financimi 100%.
Kush e nënvlerëson këtë popull bën një gabim të madh. Ne shqiptarët jemi si të tjerët kur bëjmë të gjithë si trajner futbolli, po erdhi puna te politika nuk na e ha qeni shkopin, shqiptari di të dallojë shumë mirë atë që bën punë nga ai që prish punë”, tha Rama.
