Debatet mes qeverisë dhe opozitës janë ashpërsuar edhe më tej, pas paralajmërimit të kryeministrit Edi Rama për kallëzim penal ndaj kreut të grupit parlamentar të PD, Gazment Bardhi, për akuzën e kallëzimit të rremë. Reagimi më i fundit ka ardhur nga ish-kryeministri Sali Berisha, i cili ka ngritur akuza të reja mbi përfshirjen e të afërmve të Ramës në rastin ‘Xibraka’.
Gjatë një konference për mediat, Berisha deklaroi se është në posedim të informacioneve të reja të ardhura nga një burim që ai e quajti “BKH dixhitale”. Sipas Berishës, këto të dhëna përfshijnë një foto të supozuar të Olsi Ramës dhe individëve të tjerë të dyshuar si pjesë e grupit ‘Xibraka’, e marrë në një qytet evropian.
“I them zotit Rama se shqiptarët nuk kanë kohë për hallet e tij. BKH dixhitale ka informuar për një letër të protokolluar më 7 dhjetor 2024, ku përmenden emrat e Olsi Ramës, Genti Xhixhës dhe Ermal Hoxhës. Letra përfshin gjithashtu një foto dhe detaje të një rrëmbimi të pretenduar të një biznesmeni me inicialet V.B.,” u shpreh Berisha.
Ish-kryeministri pretendoi gjithashtu se letra ishte referuar për hetim nga një oficer i policisë gjyqësore (OPGJ), por procedurat u ndërprenë pa asnjë shpjegim. “Kjo çështje u ndalua nga drejtuesja Aida Hajno, që sipas meje është një ndër veglat më të besuara të Edi Ramës në institucionet e drejtësisë,” shtoi ai.
Këto akuza pasojnë një deklaratë të Ramës një ditë më parë, ku ai i referohej çështjes ‘Xibraka’ si një përpjekje e opozitës për të fabrikuar një “Babale 2”. Kryeministri mohoi çdo lidhje të vëllait të tij, Olsi Ramës, me këtë çështje, duke u bazuar në përfundimet e SPAK, që mbylli hetimet me arsyetimin se nuk ekzistonin prova të mjaftueshme për të mbështetur akuzat.
Përplasjet politike mbi çështjen ‘Xibraka’ duket se do të vazhdojnë, ndërsa akuzat dhe kundërakuzat përfshijnë gjithnjë e më shumë personazhe dhe ngjarje, duke e bërë situatën edhe më të tensionuar.
